政壇：楊偉雄會陳家洛好怕醜
尋日都講過，盛傳將會做局長嘅特首創新及科技顧問楊偉雄，呢排不斷約見立法會議員，大部分建制派嘅議員都見咗，但有部分泛民主派議員就扭扭擰擰。
楊偉雄（左）隔住道升降機門同陳家洛握手時，全程耷低頭。
話說上星期楊偉雄因為被蜜蜂所傷而臨時取消同公文袋立法會議員陳家洛會面，當時陳家洛仲寸嘴話，避得一時避唔到一世，講到好似楊偉雄玩嘢特登唔見佢咁。時隔一星期，楊偉雄尋日終於成功同陳家洛見面，游說對方支持成立創新及科技局。
兩人會面大約一個半小時，楊雄偉離開時似乎好怕醜，婉拒同陳家洛合照，仲一支箭咁標咗入𨋢，隔住道𨋢門同陳家洛握手時全程耷低頭。
陳家洛就話，遲啲會再次邀請楊偉雄去財務委員會接受質詢。不過，肯見楊偉雄嘅議員都見得七七八八，咁仲叫佢去財委會為乜呢？最重要係無合適嘅身份出席。
