政壇：泛民議助抓加薪 獅開口
立法會議員薪津委員會尋日同政府開會，爭取提高議員助理嘅人工。白鴿黨劉慧卿、工黨李卓人（阿人）會後見記者時話，依家有五成幾議助嘅人工係一萬五千元或以下，對大學畢業兼工時長嘅佢哋好唔公平，唔單止造成流失率高，仲間接拖低咗議員嘅議政水平，所以要求議助嘅人工同公務員掛鈎。但睇番過去議助嘅質素同表現，若真係同公務員薪酬掛鈎，恐會惹嚟納稅人不滿。
設計圖片及對白
開爐 爆門 玩升降機 多前科
李卓人話現時只有一成左右嘅議助人工達到二萬五千元或以上，而政府二級行政主任嘅起薪點已經接近二萬五千元，故建議將議助人工同公務員掛鈎，希望可以挽留有意從政嘅人才。公務員薪酬待遇好就係人都知，但公務員設有考核制度，要成為公務員並唔係咁容易。相反，議助冇考核制度，而且唔少議助本身係議員嘅親戚、黨員，甚至係區議員，質素良莠不齊，根本唔可以同公務員相提並論。
另外，部分議助平日花唔少時間搞抗爭，好似去年嘅佔領行動咁，有議助竟然同佔領人士裏應外合，意圖策劃衝擊立會，又擅自將立會嘅資源供應畀佔領人士，後來部分議助仲被人發現喺立會用電磁爐打邊爐，無視立會嚴禁煮食嘅規則。同樣喺去年，工黨張超雄助理曾經利用輪椅衝向立會玻璃門；前年立會審議預算案期間，當時身為社民連梁國雄助理嘅黃浩銘，為咗阻止議員進入會議廳而玩升降機，按下所有層數嘅按鈕。部分議助嘅表現係點，相信大家都心中有數。
其實每名議員每年有二百三十幾萬辦事處營運開支，搞少啲個人宣傳同揈少啲錢，咪唔使攤大手板問政府攞錢囉。
