書展淪為垃圾崗 點止浪費咁簡單

嗱，日前書展曲終人散，本報記者現場直擊發現，唔少參展商將賣剩嘅新書隨處棄置，堆成一座座書山，包括小說、雜誌、參考書、字典等等，全部新簇簇，有啲甚至連箱都未拆添。仲有吖，現場亦遺下大量木板、紙箱、膠袋、書櫃等物資，全部可以循環再用，結果通通變成垃圾，浪費金錢事小，破壞環保事大。環保人士踢爆，每年書展棄置嘅新書及紙皮逾二百噸，等於砍伐三千四百棵樹，需動用至少六十架垃圾車至可以全部運走，問你怕未。

唔講唔知，原來清潔商只要將垃圾運往堆填區，就可以向書展主辦機構貿發局額外申領運送費，一車運送費幾千元。古人話書中自有黃金屋，唔通就係咁嘅意思？

講到呢度，大家可能會問，點解書商唔將書本及物資回收，循環再用？答案好簡單，咁做除咗要運輸成本，仲要貨倉儲存，有人慳得就慳，一棄了之。大家可能又會問，貿發局作為主辦機構，點解唔帶頭環保，舉行大型回收？原來早年貿發局的確有咁做，每年回收到百幾噸可循環再用嘅物資，後來因為外判清潔商有微言，回收行動三年前被叫停，結果咪搞成咁囉。

係人都知，本港垃圾為患，三個堆填區即將陸續爆滿，港府費盡九牛二虎之力，三堆一爐計劃至勉強過關，點知貿發局完全不顧社會責任，冇帶頭環保不特止，反而製造更多垃圾，增加堆填區壓力，簡直倒米。正如有作家話齋，貿發局及書商唔尊重文字，唔尊重環保，搞到書展冇晒形象，唔止冇文化，仲好可悲添。

最諷刺嘅係，港府啱啱設立十億元回收基金，聲稱要推動回收業發展，到頭來阻礙回收嘅正正係港府。所以話，港產官僚搞環保不嬲係葉公好龍，開口埋口叫人咪做大嘥鬼，其實講一套做一套，佢哋先至係如假包換嘅大嘥鬼。時至今日，當局嘅所謂回收措施仍然係停留喺三色回收箱階段，得個擺字，有姿勢冇實際，唔怪得環保一事無成喇！