下星期香港工業總會就會換屆，主席劉展灝尋日臨別秋波，佢話喺工總咁多年，係時候退落嚟，佢話自己由第五副主席開始排到主席期間做足十二年都冇人「跳船」，笑言亦冇得跳級。

劉展灝（左）同蘇家碧將相繼卸任工總要職，臨別互戴高帽。

劉展灝透露，本來諗住卸任後抖多陣，點知政府上月又委任佢七月開始做生產力促進局主席，由於嗰邊有好多佢工總嘅好拍檔，所以佢即時接受，繼續發揮經驗為業界効力。佢又好感性咁話，喺工總嘅時間過得非常充實，因為工總令佢多咗機會了解手錶以外嘅工業。

對於工總行政總裁蘇家碧將於九月過檔港鐵，劉展灝就感慨「人才即係人才」。蘇家碧就好感激一直以嚟都遇到好老闆，認為劉展灦為人非常友善，而佢完成今屆手頭工作後亦會待新一屆工作安頓好後先離開，稍後佢會同家人去克羅地亞旅行，輕鬆吓先返新工。

第一手消息請下載on.cc東網iPhone/iPad/Android/Windows Phone Apps