城中鏡：電子業商會力撐3D打印
香港電子業商會尋日舉行周年大會改選新一屆會董，原任副會長、信佳國際集團主席吳自豪當選新一屆會長，接替做咗兩屆會長嘅「耳機大王」楊志雄。吳自豪話，今年商會將因應3D立體打印市場發展如火如荼，在旗下增設「三維打印業協會」，以推動發展此新興行業，助業界尋找新商機。
楊志雄（左）將有電子業商會會徽嘅棒交畀吳自豪。
譚偉豪（右）同呂明華兩位立法會前議員都係工業界先進。
馮卓能（右）同趙舜培合力籌備成立三維打印業協會。
吳自豪話現時商會旗下已有半導體行業協會一個屬會，3D打印業將係第二個屬會。仁濟醫院副主席馮卓能都在場，原來佢同拍檔趙舜培就係3D打印業協會嘅發起人。馮卓能話3D打印產品大至房屋汽車，細至家用杯碟，市場好龐大。不過，由於市場啱啱起步，所以佢哋正由教育着手，目前已喺幾間中學開展。
莫乃光被指漠視業界需要
講到工業發展，業界總係批評政府做得唔夠。立法會資訊科技界前議員譚偉豪都話，政府成日被立法會拖住後腿，所以一直做唔到嘢，令愈來愈多提供創業資金嘅外國「天使投資者」寧願轉投深圳，希望政府投放多啲資源，搞多啲配套以吸引業界投資。
卸任嘅楊志雄就趁機批評現任資訊科技界議員莫乃光漠視業界需要，拖足三年仍未能爭取到成立創新及科技局。
