泛民主派立法會議員「拉布」拉到創新及科技局趕唔切喺暑假之前通過，於是又要等多幾個月；拖咗三年，距離成立都仲遙遙無期。盛傳將會做局長嘅特首創新及科技顧問楊偉雄，過去一段時間已密密約班議員見面，游說佢哋支持成立創科局，好多泛民議員都扭扭擰擰。既然咁唔想見，但又有泛民議員提出要求楊偉雄出席財委會會議，真係話佢哋唔係為做騷都冇人信啦！

設計圖片及對白

據悉，楊偉雄已見咗大部分議員，建制派方面，就只有劉皇發同立會主席曾鈺成仲未見。相反，成日都話希望楊偉雄多啲解釋創科局嘅泛民議員，其中新民主同盟范國威、街工梁耀忠同辭職嘅湯家驊就講明唔會同楊見面。

另外，有啲泛民議員口講話想同楊偉雄見面，但又扭扭擰擰，除咗白鴿黨涂謹申之外，工黨又話要全部四個議員齊晒人先肯見面，結果搞到依家都未夾到時間。而公文袋嘅毛孟靜就最過分，當面約佢就話可以見面，但佢留低個助理嘅電話號碼，就打極都冇人聽，留言又唔覆，可能要刊登尋人啟事先至得。

曾要求財委會邀請楊偉雄出席會議嘅公文袋陳家洛，本來都約咗上星期同佢見面，但唔好彩撞正楊被蜜蜂所傷，會面要臨時取消，依家改咗今個星期見面。陳家洛之前寸嘴話：「估唔到蜜蜂咁大威力」，又話佢避得一時，唔避得一世喎。

查實當日楊偉雄被蜜蜂螫傷手指，腫到番茄仔咁大，毒素仲刺激氣管收縮，呼吸困難，出唔到門口添！講真嗰句，要避見都唔會主動去約人啦，再者就算見咗班泛民議員，十月再返到財委會，唔通「拉布」會拉少啲咩？

第一手消息請下載on.cc東網iPhone/iPad/Android/Windows Phone Apps