工黨除咗啱啱當選做大埔區議員嘅郭永健之外，其他地區根本零區議員，可能臨近區議會選舉，急急腳宣傳，但搞到尋日先公布區議會一億元社區重點項目研究，莫非真係「有心唔怕遲」？

其中荃灣區社區幹事趙恩來就重提，重建西樓角花園只係諮詢咗兩個幾月，區議會入面只有三個泛民議員，居民唔清楚個項目等，話會收集簽名希望立法會財委會撤回或否決呢個項目，又批評最近見到建築署喺嗰度拆涼亭、挖坑，擔心係未通過就先做前期工程喎。不過，有關項目係獲全體區議員一致通過嘅，未知場外民意係咪大到可以推倒重來呢？

工黨之前又做咗個社區重點項目調查，問咗荃灣、九龍城、沙田、元朗、東區超過六百人，有近九成半受訪者唔知當區嘅項目係乜，只有百分之一嘅人話有區議員就項目諮詢過佢哋嘅意見，又話多數區議會在決定項目嗰陣，係由上而下，漠視居民真正需要，有亂花公帑之嫌喎。

第一手消息請下載on.cc東網iPhone/iPad/Android/Windows Phone Apps