政壇：「小嫣子」寸港台獨立王國
香港電台係本港唯一公營廣播機構，為大眾提供電視同電台等節目，但經常批評政府惹來外界爭議。「正義聯盟」召集人李偲嫣尋日率領十多人，身穿古裝抵達港台電視部門外抗議，期間高舉標語牌同叫口號，批評港台係一個「獨立王國」，違反對市民嘅承諾同責任，要求政府依法處理港台腐敗情況，還市民一個「不偏不倚、服務社會大眾的公營電台」，其後有一名港台職員代表接收請願信。
身穿太監裝嘅李偲嫣（右二）率領十多人到港台抗議，仲同謝志峰（左二）鬥嘴。
李偲嫣繼上次穿着水手校服裝後，尋日又穿上太監服，似足「殭屍」；而正義聯盟委員張東烈就扮演慈禧太后，模仿港台節目《頭條新聞》內其中一個環節，指摘其節目報道有偏袒某一種聲音，以及散播帶有歧視中國人嘅言論。李偲嫣話未來十三個星期將會繼續監察港台節目。
正義聯盟準備離開前，巧遇《城市論壇》主持人謝志峰返回港台。李偲嫣就鬧謝志峰主持節目不持平，係霸道行為，作為新聞從業員並唔專業。謝志峰就反擊話新聞從業員係看門狗，李偲嫣就話佢誣衊所有新聞從業員係狗。
