政壇：鉛慌抽水 公文袋慢幾拍
公屋鉛水風波爆發至今半個月，不論建制、泛民黨派面對年底區議會選舉嘅壓力，幾乎動作一致瘋狂抽水辦，完成一次就公布一次，而於今次鉛水風波嘅大比併中，作為泛民嘅公文袋反應慢幾拍，遲遲先至落區派水畀居民，尋日又「堅離地」喺總部開記者會，口講十二項建議跟進鉛水事件，唔單止係執輸行頭慘過敗家，再係咁分分鐘連最後抽水嘅機會都擦身而過。
設計圖片及對白
四年一度嘅區議會同立法會選舉，令各大政黨嘅疑似候選人懂得謙卑，一有機會就爭取潛在選民支持，其中選戰經驗豐富嘅立法會主席曾鈺成，可能別有一番感受，尋日接受傳媒訪問時被問及政黨爭相為居民抽水化驗，形容呢個係反映選舉嘅可愛，又反問市民會寧願政黨出嚟抽水辦化驗跟進，定係唔理市民死活喎。
民協捉到鹿唔識脫角
即使捉到鹿亦可能唔識脫角或「甩轆」收場，據稱泛民方面，民協一早收到有人提供啟明邨含重金屬嘅消息，因此謹慎起見再搵人化驗，搞搞吓就被人飲咗頭啖湯，事後開居民大會仲畀居民當面指罵。白鴿黨今次固然喺鉛水風波站喺主導地位，但最近多次被抽後腿，有人質疑最早五月已知啟晴邨食水含鉛，點解要延後兩個月先公布，負責鉛水事件嘅白鴿黨「一舊雲」黃碧雲多次就此解畫，強調要小心求證，不過似乎一時三刻都仲未完全平息相關質疑。
建制派方面，建仔喺鉛水事件起初出閘脫腳，該黨九龍西議員蔣麗芸嘅老公梁海明，被踢爆喺涉事公屋母公司總承建商嘅獨立非執行董事，幸好最後風波裏嘅茶杯，時間一過就冇人再炒作，建仔全力喺全港十八區抽水辦。另外西九新動力梁美芬亦喺九龍西抽水辦停不了，講到底係希望急起直追，於鉛水事件重獲居民歡心。不過，究竟鉛水事件發展難料，誰人可笑到最後，要睇會唔會再有新發展嘞！
