又聞塌樹傷人 管治爛到入心
呆坐樹下有咩後果？科學家可以發現萬有引力定律，獵人可以捉到盲舂舂撞樹嘅兔仔，詩人可能靈感泉湧，咁香港人又會點呢？唔好意思，除咗畀樹砸親之外，相信都唔會有其他「收穫」咯。
呢嗱，話口未完又嚟嘞。尋日下晝一點幾，中環下亞厘畢道舊政總對出一棵八米高大樹突然轟一聲倒下，一名女途人走避不及「中頭獎」，好彩只係受輕傷；亦有司機煞唔切掣，車頭被大樹砸凹，如果司機反應慢兩秒，分分鐘車毀人亡都似。現場所見，舊政總外牆出現一道道刮花嘅痕迹，塌樹威力非同小可，今次冇搞出人命，算係不幸中之大幸。
關於大樹嘅「死因」，專家睇過後係咁講嘅。倒塌嗰棵細葉榕估計有八十年歷史，咪睇表面枝葉茂盛，但其實根部已經發黑，一早就被真菌入侵，想唔冧都唔得。
如果話老樹病入膏肓，咁管樹嘅官僚一樣都係醫番都嘥藥費。大家應該記得，幾年前港大女生喺赤柱被大樹壓死，港府為應付民意，成立跨部門嘅樹木辦，聲稱要加強統籌樹木問題，又推出古樹名木冊，係威係勢咁款，可惜講就天下無敵，做就有心無力，塌樹問題冇改善，反而不斷惡化，舊年又有孕婦被塌樹擊中，釀成一屍兩命慘劇，唔單止全城鬧爆，連申訴專員公署都睇唔過眼，主動調查樹木辦有冇失職。你話嘞，官僚如果唔係病到五顏六色，瘟瘟沌沌，就唔會管樹管到一鑊粥喇。
講起真係唔知好嬲定好笑，香港成日自詡國際大都市，但每次打風落雨，市面例必滿目瘡痍，亂過亂世佳人，特別係塌樹事故幾乎區區都有，危機四伏，市民出入平安成為奢望。咪話太一叮唔提醒，颱風季節又到啦，唔該官老爺們打醒十二分精神，萬一又試搞出人命，呢隻鑊你哋孭唔起。
話時話，唔知係咪人衰行路打倒褪，香港近排好似撞邪咁，乜嘢匪夷所思嘅怪事都可以發生，塌樹只不過係小兒科咋。唔係咩，呢頭鉛水風暴愈揭愈大鑊，到依家都未知點收科；嗰頭醫院又霉菌大爆發，短時間內已經造成兩人死亡，簡直鑊鑊新鮮鑊鑊甘，下次唔知又衰邊瓣添呀。
冇計喇，蠹眾而木折，隙大而牆壞。樹木蟲蛀根部，難逃一死；港府管治爛到入心，施政好似行屍走肉咁，香港又點會有運行吖，叮！
