政壇：搞搞政：郭永健執死雞建制有憂有喜

明星齊助拳 得票僅38%

工黨主席兼立法會議員李卓人話補選結果反映選民支持泛民否決政改方案。但睇真啲，郭雖然贏咗，但只取得近一千四百票，佔總有效票約三成八。反觀兩名聲稱獨立、但係人都知有建制背景嘅對手何萬傑同羅曉楓合計就有成二千二百幾票。若非兩人互相搶票，仲啱啱好搶到各得約一千一百票，泛民無可能執到死雞。

有非工黨嘅泛民人士更指出，今次補選，各泛民黨派嘅政治明星都有輪候出動拉票，結果成功將投票率推高至逾四成二，顯著高於一般嘅區議會補選，但最終郭嘅得票仍唔到四成，再次證明高投票率有利泛民之說已唔存在。如果李卓人講得啱，呢三成八選民就代表咗支持否決政改嘅市民比例，泛民喺嚟緊兩場選舉就死得！

睇番兩名疑似建制派候選人加起嚟嘅得票，比該區原區議員、因欺詐罪成而喪失議席嘅羅舜泉，喺一一年區選取得嘅約二千一百票仲要多，喺數學上，呢區仲係建制派陣地，未有因欺詐醜聞或內訌問題而完全失守。只要建制派喺未來幾個月修好，協調出單一人選，要攞番呢個位應該冇乜難度。

但呢個亦正正係建制派嘅最大問題，喺早前嘅政改「甩轆」同之後嘅WhatsApp外洩風波，建制派有幾團結，大家都睇到。建制派就年底區選仲有多個選區未協調好，因湯家驊辭職而引發嘅立法會新界東補選，亦有多個建制派聲言要派人參戰，唔似泛民咁，好快就協調出公文袋楊岳橋一人參選。如果建制派未能吸取今次補選嘅教訓，繼續互不相讓，新東議席估計又會拱手讓予泛民。