政壇：栢志高或「升呢」執掌西九
西九文化區工程一波三折，首先出現超支及延誤問題，現有資金僅足夠興建第一期、第二期工程，但第三期工程落實無期，而現任西九行政總裁連納智亦已辭職，預料喺下月初離任。據了解，西九文化區董事局今日開會，有傳會討論由舊年十月上任西九營運總裁嘅栢志高，接替連納智出任行政總裁，似乎想栢志高呢個前政務官執西九呢個爛攤子。
西九董事局今日開會，有傳會討論由栢志高頂替連納智出任西九行政總裁。（資料圖片）
連納智（資料圖片）
有西九董事局成員證實，一早提出今日會議要討論由誰人接任行政總裁一職，另有西九董事局成員稱，暫時睇唔到討論行政總裁繼任人嘅議程，唔排除有人臨時提出討論此事。
不過，有董事局成員未開會，就表明反對由栢志高直接頂上做行政總裁，事關依家全球招聘都未完成，佢估計最多只會傾由栢志高署任行政總裁一職，因為每次開會都有行政總裁報告，估計有可能會交代最新招聘情況喎。
