本立法年度最後一次立法會大會喺上周初舉行後,一批統計數字陸續出爐,立法會秘書處尋日有一份文件,統計七十名議員喺過去三個立法年度提出動議無約束力嘅議案數目,同埋申請失利嘅次數,發現最黑仔嘅係中總代表Martin廖長江,合共多達十二次申請失利,其次係公文袋議員郭家麒,佢前後共有十一次。

廖長江同郭家麒提出無約束力嘅議案,申請失利逾十次之多。(資料圖片)

郭家麒(資料圖片)

郭家麒稱早前試過排議程排唔到,或讓路畀六四辯論,所以申請咗都決定撤回,因此過去三年只試過提出一次動議辯論。值得一提嘅係,被視為「四大懶蟲」之一嘅鄉議局代表劉皇發,過去三年都未「開齋」,冇提過任何動議辯論。

文件同時顯示,一眾議員喺過去三個立法年度,普遍只獲分配一至兩次議員議案辯論,有心水清嘅政界中人分析,或者同激進泛民於財政預算案連續多年拉布有關,搞到好多大會都冇咗議員議案辯論,舉例指於二○一二至一三年度嘅立法年度合共有五十次動議辯論,二○一三至一四年度就下跌至只有四十次,而本立法年度再銳減一半,合共僅得十八次。

第一手消息請下載on.cc東網iPhone/iPad/Android/Windows Phone Apps