政壇：當差曾受辱 李明逵淡定應對
警民關係喺舊年佔領行動期間受到衝擊，前線警務人員更受到唔少批評責難，身為警隊前「一哥」嘅李明逵自爆，喺任職警隊時，曾畀人鬧過「烏龜、黃皮狗、白皮豬」，又話即使社會對警察有意見，甚至有人話前線警務人員係「黑警」，惟一個成熟、有智慧嘅人，係唔會畀呢啲說話影響。佢仲話佔領行動期間，聽到唔少人支持警隊，強調最重要係警隊可維持專業責任、遇有重大事件同危機係咪可以處理。
李明逵（中）自爆畀人鬧過烏龜等動物。
已退下火線八年嘅李明逵話，依家每周會抽兩日打波、游水，平日烹調自己喜歡嘅餸菜，閒時會返回母校中文大學新亞書院，教授師弟妹領導才能，另外，佢最放唔低係培育青少年嘅工作。
事有湊巧，香港青少年軍總會今年初成立，由於有解放軍駐港部隊嘅代表做榮譽贊助人，外界一度擔心總會會否向青少年「洗腦」，身為總會諮議會成員嘅李明逵重申，唔應該將事件政治化，又話社會只係多一個制服團體，讓青少年接受軍旅式培訓，學習自強、自信同自律，同其他青少年活動其實冇分別，據知今個暑假過後將會展開招募。
