股神都有「異能」,就係見到嘢,見到啲大家見唔到嘅嘢。中外股神近排又齊齊見到嘢:先有巴菲特喺人人怕咗希臘時,竟然衝去掃咗個希臘小島話搞地產;再有本地嘅陸東喺依家人人搶住上車時,話佢自己盡量少揸港樓。

陸東

巴菲特

今次希臘嘅債務危機,希臘好似叫做抖啖氣,但實情係全世界仲好懷疑呢個火地獄唔知燒幾耐同點收科。話口未完,股神巴菲特上星期四就扯埋意大利富豪Alessandro Proto一齊,飛身撲入火坑,兩個夾份用1,500萬歐元,即是大概1.26億港元,買咗個叫Agios Thomas嘅希臘小島,仲講明話搞地產,話起住宅添!

至於星級分析員陸東,因個人理由暫別咗股壇半年,上星期先復出。呢個時候,人人衝去揸磚頭,陸東尋日竟然話,佢依家嘅個人資產配置,磚頭佔比係歷史新低,皆因港樓供應增,樓價再升空間唔大。嗱,佢話自己唔係睇淡港樓。呢啲唔叫做「睇淡」,只係愈揸愈少啫!

依家啲細價樓升得勁過啲大價樓,發展商又專推細單位,買樓人人興買細。點知陸東就話「如果講得涼薄啲,呢類單位好難住,一旦樓市出現調整,呢啲單位冇乜人會買。」

好似上述兩位咁睇到「危中見機,機中見危」,你都得?咁當全世界得番你自己一個咁睇,仲夠唔夠膽講出嚟,甚至行動埋先?所以話,股神基本功,其實係嗰份能夠力排眾議獨立思考嘅勇氣同自信。

第一手消息請下載on.cc東網iPhone/iPad/Android/Windows Phone Apps