年底就係區議會換屆選舉,政府開始分階段展開宣傳工作,包括製作電視宣傳短片、電台聲帶及海報等,藉此加強選舉氣氛。以往唔少政府宣傳片同聲帶都鍾意搵藝人參與,希望藉住佢哋嘅知名度加強宣傳效果,但近年唔少藝人都形象麻麻,部分捲入吸毒、醉駕等惡習同醜聞,再加埋舊年佔領行動期間,唔少藝人都曾表達佢哋嘅政治立場,所以政府今年要搵人宣傳區選都唔係咁易。

撞啱立法會尋日一個委員會,有泛民議員特別提及,如果有意邀請藝人參與宣傳工作,應該要考慮吓佢哋嘅政治背景,以及同參選人嘅關係,曾經強烈表達過政治立場同身兼人大、政協嘅藝人都唔係咁適合。

佢仲提到,二○○七年立法會香港島補選,有藝人曾經為當年有份參選嘅葉劉淑儀助選,翌年該名藝人就幫政府拍立法會選舉嘅宣傳片,角色似乎有衝突。一句到尾,如果政府搵藝人時要考慮政治背景、聯繫同立場,又要顧及其形象係咪健康,單係呢項工作已經相當費神。

第一手消息請下載on.cc東網iPhone/iPad/Android/Windows Phone Apps