政府早前要求立法會財務委員會加開長達二十八小時嘅會議,一如所料,民生項目撥款全數通過,但成立創新及科技局撥款申請因泛民拉布而被拉倒,三年內第三度難產,預計十月復會再度闖關,到時誰人出任財委會主席主持大局成為焦點。事有湊巧,剛卸任財委會主席嘅張宇人突然表明心迹,預告很大機會唔連任下屆財委會主席,又笑言「劈友」易過「剪布」。如果根據建制派早前協議,下屆財委會主席根本冇張宇人份,莫非佢心郁郁,再作表態,其實係想以退為進?

(設計圖片及對白)

張宇人尋日接受電台訪問時,話有信心十月通過成立創科局,原因係多數議員曾向佢表明支持通過有關方案,加上十一月區議會選舉,因此認為議員會先通過創科局。其後佢提及財委會主席權限,直指財委會主席冇權力「剪布」,自己亦唔懂得「剪」,更笑言「劈友」易過「剪布」,預告很大機會唔會連任下屆財委會主席。

東北撥款爭議 星爺出線難

政圈分析,張宇人此時此刻忽然表明心迹,疑事有蹊蹺,事關建制派早年曾內部協議,新一個立法年度由金融界議員「星爺」吳亮星接掌財委會主席,惟星爺於上個立法年度擔任主席,特別喺處理新界東北發展前期撥款爭議嘅做法,一來被泛民窮追猛打,二來建制派中人亦搖頭嘆息,有人更直言星爺主持會議,真係撐唔落手。

由此考慮,建制派只餘下兩個選擇,一係撐張宇人連任主席,一係撐最近不時向泛民開火嘅保險界議員陳健波「升呢」任財委會主席,據知撐陳健波一方認為對方表現硬淨,值得再上一層樓,但有部分建制派認為,如貿貿然換上新手接任財委會主席,泛民或會喺最後一個立法年度「玩嘢」玩殘陳健波。再者話分兩頭講,如張宇人無意再做財委會主席,又有乜嘢需要再作表態,莫非佢真係喺腦海中閃過連任嘅情景,所以趁機以退為進,嚟測試支持度?

第一手消息請下載on.cc東網iPhone/iPad/Android/Windows Phone Apps