屋署樣樣甩漏 點止驗窗拖拉

就講一二年開始實施嘅強制驗窗計劃吖，按照規定，屋宇署會向超過十年樓齡大廈嘅業主發出驗窗通知，而喺正式通知前，會先向相關法團發出預先知會函件。問題就出喺呢度嘞，預先知會函件淨係話業主最快兩個月後要驗窗，但冇講明最長等候通知時間，搞到業主無所適從。有業主就講得啱嘞，如果依家驗窗，到收正式通知時，又要花多筆錢重新檢驗，豈不是搵自己笨。唔少業主甚至講到明，一日未收到屋宇署法定通知，一日都會按兵不動咁話。

咪以為呢啲係個別現象吖，強制驗窗計劃實施至今三年，屋宇署向約八千幢目標樓宇發出預先知會函件，當中近四成依家仲未收到正式通知，有業主足足等咗兩年，搞到半天吊，驗又唔係唔驗又唔係，你話係咪靠害吖！

話時話，屋宇署拖拖拉拉，業主無所適從仲係其次，最怕窗戶日久失修，隨時出事，咁就大鑊嘞。唔係講笑o架，舊年之嘛，太子港鐵站附近一幢舊樓有鋁窗從十三樓直飛地面，雖然冇人受傷，但已令途人抹一額冷汗，點知事發至今超過一年，屋宇署仲未正式通知相關大廈驗窗，你話係咪不負責任吖？唔通真係要搞出人命至補鑊？

講真，屋宇署早就成為申訴專員公署同審計署調查嘅常客，表現有口皆悲，又點止驗窗不力咁簡單吖。好似自願申報違例招牌計劃咁，既冇提供誘因，唔參與又唔使負刑責，加上宣傳不力，好多人根本唔知有呢個計劃，結果反應冷淡，截至去年只收到七十二份申請，佔全港違例招牌唔夠百分之零點一，簡直得啖笑。

至於清拆僭建物，更加係講多過做。屋宇署過去發出嘅清拆令當中，近七萬份未獲業主遵從，其中逾兩成發出六至十年，最誇張嘅甚至長達三十年。正因為屋宇署有法不依，執法不嚴，導致問題尾大不掉，先至會頻頻出事，造成唔少人命傷亡。

始終都係嗰句︰求人不如求己，靠官不如靠自己。太一叮奉勸市民，想出入平安，都係自求多福，戴定頭盔行騎樓底穩陣啲，叮！