政壇：盛女鑽石媒人入新民黨
好多政黨都鍾意吸納專業人才，好似一向不乏高官同專業人士加入嘅新民黨，最近就邀得有「鑽石媒人」之稱嘅廖吳美玲（Mei Ling）加入。Mei Ling之前因幫電視「盛女」真人騷任幕後顧問而知名，據聞佢手上有唔少優質筍盤，莫非加入新民黨係幫手牽紅線？我哋問過新民黨主席葉劉淑儀，佢話主要係大家理念相近，而該黨本身桃花都好旺盛，應該唔使Mei Ling出手喎。
「鑽石媒人」廖吳美玲（Mei Ling）獲邀加入新民黨。（資料圖片）
葉劉話，早前Mei Ling同該黨副主席田北辰（田二少）喺社交場合碰面，雙方都幾傾得埋，田二少就邀請對方入黨，對方亦感興趣，就促成咗呢件事。葉太又大讚Mei Ling係現代紅娘，由青年人成家、求偶，到七、八十歲長者嘅姻緣都撮合到，但最重要係大家理念同教育背景相近，所以先咁啱傾。
講開姻緣，葉劉話新民黨嘅桃花都好旺，早前先有幾對新人拉埋天窗，每月都有黨友蜜運添。佢又話每月都有人申請入黨，唔少仲係顧問、醫生、商人等，成績好理想。
