政壇：黃友嘉自爆 冇接屋企班
荃灣青年商會尋日舉行第二屆傑出企業傳承選舉啟動禮，家族做塑膠生意嘅強制性公積金管理局主席黃友嘉（David）應邀做主禮嘉賓。David自嘲唔係企業傳承嘅好人辦，事關佢讀完書後曾經返家族企業幫手，但發覺哥哥更擅長做生意，所以佢就淡出，轉為發展自己嘅興趣，近年就慢慢轉型做公職。
黃友嘉（中）現身支持莊金峰（右）同麥頌斌嘅企業傳承選舉。
David話，由於自己都冇接班，所以對兩個女冇特別要求，任由佢哋做自己嘢。佢話，香港上一代人多數由工業山寨廠起家，慢慢發展成現時嘅規模，唔少企業仲維持一定嘅競爭力同生命力。但講到傳承或接班，仲有好多工夫要做，希望藉住呢類選舉，鼓勵多啲人關注香港工業，兼趁機嘉許得獎企業。
選舉嘅籌委會主席麥頌斌就話，呢次選舉係該商會嘅旗艦活動，即日起至九月中旬接受提名，冀激勵企業培育未來嘅商業領袖。
