衣食住行百無 水泉澳邨淪孤島
【記者詹海萍、黃芷君報道】房署龜速興建配套，新入伙屋邨成孤島！位處山上的沙田水泉澳邨於今年四月下旬陸續開始入伙，居民原以為終覓得安樂窩，未料邨內交通配套不足，居民出入均有困難。區議員直指房署負責興建的公共運輸交匯處延遲完工，致居民入伙後仍未獲得足夠交通工具往返家園，要求加快興建邨內設施，同時與運輸署緊密合作，確保交通配套合乎需求。
丘文俊直斥水泉澳邨不論衣食住行配套均欠奉，公共運輸交匯處亦遲遲未完工。
水泉澳邨入伙三個月以來，九巴288號線仍是居民出入之唯一公共交通工具。
鄭小姐建議巴士公司加密班次。
九巴288號線於非繁忙時間為二十分鐘一班。
「我行上嚟都要十五分鐘，女士就起碼要行二十分鐘度，但夜晚我都唔會畀個女一個人行上嚟，惟有我親自落去接佢。」王先生一家剛入住沙田水泉澳邨，直指屋邨單位現已相繼入伙，但交通配套卻不足，「呢條邨四月就入伙，三個月嚟都係得一架288號巴士去沙田，但十一點就尾班，班次又唔係多，個女放工已經冇車返屋企，啱啱先有多架小巴，但分分鐘等成二十五分鐘一班，仲要十點半就尾班車！條邨愈嚟愈多人，得咁少車邊夠？」
而即將遷入水泉澳邨的鄭小姐亦認為屋邨交通配套不足，加上未有商場等其他配套，即使購買日用品及食物亦需乘車外出，故建議巴士公司加密班次，「我上嚟嗰陣咁啱有車都唔係等咗好耐，不過之前都有二十幾人等緊，都冇咩位坐，要抱住小朋友企。」
「好似畀政府呃咗入嚟」
「原本個公共運輸交匯處係應該四月尾啟用，即係同條邨第一期入伙同期，但到依家都未搞掂，居民係就係入咗伙，但出入配套都唔夠，好難怪有啲居民講笑咁話好似畀政府呃咗入嚟咁！」當區區議員丘文俊表示，水泉澳邨現時不論衣食住行配套仍屬「百無」，每日均接獲居民反映交通配套不足，要求房署加快興建設施，同時與運署緊密合作，確保交通配套合乎需求。
房署發言人表示，水泉澳邨由今年四月開始辦理入伙手續，承認現時邨內不少工程仍在進行中，臨時辦事處在辦理入伙手續時已向租戶簡介邨內當時的交通配套及其他設施等情況，以便租戶自行決定是否接受單位編配，而公共運輸交匯處工程已進入驗收階段，期望交匯處能於七月底開放。
運輸署發言人則指，為配合水泉澳邨入伙，已安排九巴288號線來往沙田市中心，於六月底起安排專線小巴813及813A供市民來往石門及沙田醫院，稍後仍會按入伙進度及乘客需求陸續增設巴士及小巴服務。發言人又承認，已留意到288號巴士乘客人數逐漸上升，而九巴亦將在七月內加強服務，並延長服務時間。
熱線：3600 9988
電郵：socserv@on.cc
傳真：3600 9900
WhatsApp/SMS：6500 6500
來函請寄：香港大埔工業邨大昌街23號東方報業中心東方報業集團投訴組收
個人資料絕對保密
匿名投訴恕不處理
逢星期一至五見刊
