單車徑唔湯唔水 大隻講一事無成

話說港府○八年宣布耗資二十二億元興建超級單車徑，話要將新界區多條單車徑串連起來，打造一個貫通新界東西、全長一百多公里嘅超級單車徑網絡喎。當時好多人已經批死，港產官僚講就天下無敵，做就有心無力，睇怕又係爛尾收場，結果不幸而言中。

呢，港府日前向立法會提交嘅文件承認，超級單車徑網絡其中一段主要工程、荃灣至屯門段因受實地環境限制，加上部分居民強烈反對，當局正檢討工程，並重新諮詢區議會；而元朗至南生圍等多個路段亦因為技術困難，暫時唔會動工。咁即係點？即係成個計劃甩皮甩骨，超級單車徑隨時變「低級單車徑」囉。

話時話，單車遊既健康又環保，超級單車徑唔單止可以為市民提供多一個消閒選擇，仲可以發展成旅遊景點添。唔使講到外國咁遠吖，淨係睇吓隔籬深圳，位於紅樹林海濱嘅單車徑道路寬闊，海景怡人，都唔知幾受歡迎。

唔怕唔識貨，最怕貨比貨，人哋單車徑搞到有聲有色，港府就講多過做，簡直不可相提並論。除咗新界超級單車徑，當局亦曾計劃喺港島同九龍嘅海濱興建單車徑，可惜一樣係得個講字。

單車徑天殘地缺，唔方便事小，危機處處先至大鑊。你知啦，好多單車徑嘅路段同公路交集，以致經常出現人車爭路嘅驚險場面；最攞命嘅仲係俗稱「神主牌」嘅倒U字形減速欄，本來係提醒減速，結果好多單車友反而因收掣不及撞欄，甚至試過搞出人命添。唔講唔知，每年涉及單車嘅交通意外傷亡人數仲多過電單車，踩單車同搵命博冇乜分別嘅咋。

冇計喇，港府基建項目甩甩漏漏，烏龍百出，超級單車徑嘅亂象只係冰山一角啫。大家有眼見，大型工程幾乎無一不延誤，無一不超支，淪為一個又一個財政黑洞；即使順利落成嘅，亦係問題多多，亂象叢生，唔係成為大白象，就係成為豆腐渣工程，你話納稅人係咪冤枉吖。

講多無謂，食多會滯。港府開口埋口集中精力改善經濟民生，點知家陣連條單車徑都搞到唔湯唔水，甩皮甩骨，想唔承認無能都唔得喇，叮！