城中鏡：沈祖堯再寫沙士籲團結
「新沙士」再次勾起港人「百日抗疫」嘅回憶。食啱個勢，人稱「沙士英雄」嘅中文大學校長沈祖堯，近日再度出書《當天空改變》分享抗疫點滴，吸引逾百名市民到書展會場搵佢攞簽名。沈校長話懷念抗疫嗰一百日，因為市民好祥和，互相勉勵，立法會亦無爭拗，反之近日社會就充滿撕裂，非常無奈。
沈祖堯出書分享沙士康復者人生得以改變嘅經歷，期望帶給港人正能量。
沙士呢場仗史無前例，難怪沈校長再度執筆，依然大把嘢寫。佢追蹤沙士病人劫後餘生嘅經歷，當中包括一位曾命懸一線嘅年邁銀行家，康復後兒孫滿堂，不時捐錢幫助貧苦大眾。
另一方面，沈校長語帶哽咽話，雖然沙士奪去六名醫生同四名醫護人員嘅生命，亦睇住唔少家庭生離死別，但點點傷痛化成抗疫力量。今次佢再度出書，期望喚醒港人珍惜當下，同舟共濟，即使遇上政治分歧，都唔應該訴諸暴力或謾罵喎。
