城中鏡：法領事做Banker港緣未了

喺政商界長袖善舞嘅栢雅諾，經常出席大小文化藝術活動，同娛樂圈中人也非常稔熟，要數外國總領事，佢都算係風頭躉，難怪有大企業請佢做銀行家。聽聞間銀行係新公司，早前已喺巴黎設立總部，栢雅諾完成任期後，九月初就飛去巴黎上班，為在港設立亞太區總部做準備。大假都唔放就返新工，睇嚟佢學足香港人咁拚搏喎。

查實栢雅諾好享受港式生活，早前佢接受訪問時指喺香港可買齊晒所需嘅法國產品，非常方便，如今如願留港發展，真係飲得杯落。據聞新任駐港領事九月一日上任，名叫Eric Berti，依家係法國駐悉尼總領事，外交經驗唔少，相信不難適應香港工作。