城中鏡：行行出狀元
凝聚青年人嘅「青年廣場」成立五周年，日前大開生日慶祝派對，咁啱當日係中學文憑試放榜，現場見到搞過唔少青年發展工作嘅觀塘區議會主席Bunny陳振彬，回想當年會考路艱難辛酸，為幫補家計，未等放榜就馬上搵工賺錢。
陳振彬（左）巧遇商務及經濟發展局前常任秘書長蔡瑩璧，互相問候。
鄭志明寄語青年人要有冒險精神，敢於嘗試不同行業。
張俊勇（左）會考數學攞Ａ，洪為民就十五歲考入理工大學，兩個都係叻人。
講起會考成績，Bunny直言考得唔錯，可惜當年家境清貧，佢身為大仔，唔想加重父母擔子，呢頭考完試，翌日已喺工廠返工。佢經朋友介紹到製衣廠任職文員，人工六百元，但佢無放棄升學夢，下班後去夜校進修，完成會計專業文憑課程。捱咗四年，佢終於儲到二千五百元，決定自立門戶開製衣公司，至今身家數以十億計。
鄭志明：多遊歷擴視野
雖然起步比別人艱難，但Bunny認為係磨練嘅好機會，寄語青年人喺唔同範疇尋找上位機會，唔好怕辛苦，亦唔需要介意起步時職位低微，只要肯力爭上游，行行都會出狀元。相反，在場另外幾位名人就似乎比較順利，好似中華總商會會董張俊勇會考數學攞Ａ，但佢話普遍同學就有八、九科Ａ，佢算係水皮喎。
現場亦有唔少由青年人擺設嘅創意攤位，新世界設施管理有限公司主席Brian鄭志明興致勃勃咁逐一參觀。見到班後生仔活力十足，Brian都勉勵大家，要抱開放態度接受新挑戰，唔需要「讀嗰科做嗰科」。佢又鼓勵青年人多爭取機會，到內地或外國工作或遊歷，擴闊視野，了解唔同國家文化，趁後生承受多啲挫折，認真語重心長。
