政壇：搞搞政：IC轟一舊雲惹反擊
早幾日都講過，新聞統籌專員IC馮煒光被發現同身穿火辣三點式泳衣嘅女友到深水灣沙灘暢泳兼曬太陽，唔知係咪曬到「㷫合合」仲未降溫，尋日佢喺社交網站再就近日嘅公屋食水含鉛事件，同白鴿黨前黨友爆發罵戰。
設計圖片及對白
話說白鴿黨立法會議員「一舊雲」黃碧雲早前率先踢爆啟晴邨食水含鉛量超標，可以話係攞咗頭彩。不過，作為佢前黨友嘅IC尋日朝早就喺社交網站三度轉載報章，質疑一舊雲拖延公布事件嘅報道，又留言話一舊雲五月初已經知悉「鉛水」事件，但就延至七月五日先至公布，質疑一舊雲如果係真心為市民健康着想，點解「坐住兩個月」，仲叫一舊雲「站出來，面對公眾」，解釋清楚咁話。
IC呢番質疑，反被一眾白鴿圍剿。白鴿黨南區區議員柴文瀚見到IC喺度向一舊雲挑機，就反叫IC解釋，點解政府對食水含鉛不知情，又質疑政府係咪因為涉及中國內地外判商問題，而有所隱瞞。柴文瀚仲反駁IC話一舊雲唔敢面對公眾同記者嘅講法︰「日日開居民會啦，馮專員！」「居民會無記者？」不過，IC依然不斷重複「請黃碧雲議員站出來」嘅留言，又話︰「原來我有份創立的民主黨，變成不敢面對公眾和記者！不敢解釋！」柴文瀚就繼而嘲諷IC，原來佢嘅職責係叫口號，而多隻乳鴿亦都加入戰團幫拖。
三度驗水為確保準確
一舊雲其後發新聞稿，再次解釋自己四月底開始喺九龍西嘅大廈或屋邨抽水辦化驗，發現只有啟晴邨水辦含鉛，於是上月再針對啟晴邨同德朗邨，進入第二階段深入調查，為確保食水含鉛嘅準確性，以免引起公眾恐慌，佢六月底再驗多次，先舉行記者會踢爆事件，重申三度驗水都係為咗小心求證，怒斥IC非急市民所急，反而喺度抹黑同歪理連篇。
其實IC同前黨友開戰已經唔係第一次，究竟係佢哋之間嘅恩怨吖，定係IC想幫政府喺鉛水風波上轉移視線呢？睇怕佢自己先知喇！其實政府已就鉛水事件認衰，作為政府一分子，不如將精力放喺善後工作好過啦！
