政壇：滙豐善款加碼賀150歲
雖然滙豐近年係咁被人罰錢收稅，搞到又話要遷冊，又話要賣仔，但似乎荷包仍然脹卜卜！事關今年適逢滙豐成立150周年，集團除咗每年捐開嗰1.14億美元畀全球社區投資計劃外，今年仲額外加碼一倍，捐多成1.5億美元做慈善基金，可以喺未來三年資助世界各地嘅社區計劃同慈善機構，受益機構超過140個。
舊年就有超過五萬名滙豐員工一齊投選今年慈善項目主題，得票最高嘅幾個，就係「青少年和教育」、「醫療福利和研究」同「環保和野生動植物」。集團主席范智廉都話：「好欣慰能夠額外捐1.5億美元做社區慈善基金，作為一間商業機構，我哋相信教育、醫療福利等等，對於建立穩健嘅社區係非常重要！因為呢啲都係經濟同各行業蓬勃發展嘅基礎嘛。」
