政壇：維權股東被挑機 艾肯狙擊貝萊德
維權股東四圍狙擊企業，注定洗唔甩「搞搞震」嘅形象，呢方面，八十年代就已經搞維權嘅艾肯，肯定比所有人清楚。不過，佢老人家前日嚟個大反擊，話貝萊德（即是全球最大資產管理基金兼ETF主要發行人）先至係會搞冧個市嗰個。
芬克
艾肯
艾肯係喺一個基金界論壇上發炮，瞄準同場嘅貝萊德CEO芬克嚟開火。艾肯話：「貝萊德係間極度危險嘅公司！」又話唔係針對芬克個人。艾肯愈講愈High，話依家個市好似成班飲醉嘅債券投資者喺架大巴上面，開P開到High晒，唔知架大巴就嚟衝落懸崖。艾肯仲笑騎騎問台下聽眾：「知唔知邊個揸車？咪就係芬克同耶倫（聯儲局主席）囉。架車結果點撞毀？咪撞落舊黑色嘅石到囉。」（Black Rock，即係貝萊德）
芬克好明顯辣着咗，即場反駁話ETF令市場更加透明，仲兜口兜面話：「Carl（艾肯），你投資就叻，不過你今次又錯，仲錯到無倫！」
針鋒相對成咁，唔通兩位有仇？話說幾個月前，芬克發咗封公開信，呼籲啲企業阿頭要企硬睇長線，封信畀人話係向啲維權股東挑機。艾肯今次仲唔係還拖！
