政壇：公文袋執「水」尾補鑊
「鉛水恐慌」不停擴散，為咗唔畀率先揭發啟晴邨食水問題嘅白鴿黨專美，各大政黨奇招盡出，不單主動為居民驗水，更加積極約見運輸及房屋局官員討論有關問題。不過，唯獨公文袋後知後覺，直至尋日都仍未見該黨議員約見官員，亦都無就事件採取行動，公文袋議員陳家洛反而大費周章，要求財委會邀請創新及科技諮詢委員會顧問楊偉雄列席會議，完全失焦，尋日又急急撤回要求，認真離譜。
設計圖片及對白
陳家洛指跨黨派議員促取消
財委會早前答應加開兩小時特別會議，討論楊偉雄列席會議一事，其實今個星期本身已經有二十八小時會議要開，再加兩小時，好多議員都大呻辛苦兼無謂。被質疑想借楊偉雄拉布嘅陳家洛，尋日終於知衰，主動去信要求秘書處撤回討論事項，變相取消尋日嘅特別會議，認真嘥公帑。佢直認係因為近日跨黨派議員忙於處理屋邨食水含鉛事件，向佢反映要求取消會議，而因為議員「拉布」，創新及科技局嘅撥款申請好大機會推到十月，所以請楊偉雄列席會議失去迫切性。
但講到底，其實係因為各政黨都喺事件中抽水，好似搞居民大會、驗水、逼政府承擔責任咁，但公文袋乜都未做，惟有取消會議，為自己爭取時間。咁講都唔係無根據，事關尋日六小時嘅財委會完全唔見陳家洛蹤影，原來佢唔搞創科局之後，即刻去咗為鉛水事件補鑊。佢話去咗同唔同嘅承建商開會，而該黨亦收集咗幾十個水版，計劃為居民驗水，預計五日之後有結果。
政治一日都嫌長，五日之後，都唔知乜嘢世界，況且其他政黨都已經驗咗水，公文袋執水尾，似乎爭取唔到乜嘢政治光環。
