平機會充闊充大 周一鑊自把自為
由儉入奢易，由奢入儉難，呢句說話香港人應該好有同感。點解咁講？好簡單，睇吓近年嘅基建超支如同無底洞咪知囉。不過咁，基建係必需嘅建設，就算超支都好過嗰啲政治花瓶，本來已經冇乜存在價值，加上洗腳唔抹腳，簡直害人害物。
太一叮講緊嘅咪就係由廢官周一嶽出任主席嘅平機會囉。平機會過去多次被揭發大花筒，周一鑊上任後變本加厲，唔止充大頭鬼浪費公帑，而且無事生非，添煩添亂。係咁嘅，平機會現有辦事處被業主加租，租金由每呎二十多元激增至四十四點五元，平機會諗縮數，一味攤大手板，要求政府每年增加五百二十萬元額外資助。咁仲唔止，平機會聲稱為咗應付新增人手及工作，需額外租用一千八百呎新辦事處，租金比現有辦事處更貴，呎租達四十九元，結果又要求政府每年增加一百二十六萬元補助，加加埋埋，每年淨係租金嘅額外開支就達六百四十多萬元。最騎呢嘅係，平機會明明坐擁逾二千萬元儲備，本年度更有二百二十幾萬元盈餘，居然仲好意思伸手問政府攞錢，你話係咪離譜吖？
即係咁，今時今日樓價不斷攀升，業主加租唔出奇，正常人都會量入為出，租金太貴咪搵地方搬囉。偏偏周一鑊冇咁大個頭要戴咁大頂帽，唔係甲級寫字樓唔租，唔係豪華裝修唔要，咁搞法，多多錢都唔夠佢浪費喇。正如關注團體質疑，一般公營機構都唔會喺市區旺地開設辦事處，平機會點解可以例外？自己洗腳唔抹腳，仲要政府埋單，咁同打劫納稅人荷包有乜分別？
最荒謬嘅係，周一鑊懶得就懶，蛇得就蛇，早前提出僭建一個月薪十六萬元嘅營運總裁職位，話要分擔主席嘅「沉重」職責喎。好嘞，呢個建議本來已經被指為疊床架屋，缺乏諮詢及浪費公帑，點知平機會唔係從善如流，收回成命，反而提出喺新架構實行兩年後，再花公帑聘用外間專家及顧問進行檢討，納稅人被迫為新總裁埋單之餘，仲要再幫周一鑊補鑊，仲成世界嘅？
講真，平機會成立以來，除咗醜聞不斷，可以話係一事無成。淨係周一鑊搞出嚟嘅「族內歧視」及「保障事實婚姻」立法，已經是非多多，添煩添亂。冇計嘞，港府有眼無珠，廢柴當沉香，係都要搵周一鑊翻閹出掌平機會，結果咪搬起石頭砸自己腳囉，叮！
