前晚喺一個公開場合遇到九巴後人雷兆光，佢指太太雷林靜怡同仔女去咗三藩市遊學兩個月，而佢自己因為工作，月底先到當地同佢哋會合。

雷兆光月底會到三藩市會合太太同仔女。

佢又透露十四歲嘅大仔因為喜歡打籃球，依家已六呎一吋高，亦曾到美國參加籃球訓練。問到仔仔會唔會希望喺籃球界發展？佢話：「唔會，佢唔夠非洲裔籃球員鬥，嗰啲喺體能上都好勁。」問到仔女係咪好黐身？佢笑言：「好黐我哋，好close，我每晚都陪佢哋，做廿四孝爸爸，佢哋又做廿四孝仔女。」

同場嘅珠寶設計師陳瑞麟向來熱衷攝影，佢希望把作品輯錄成書，喺年內推出。佢話：「我對攝影好有興趣，尤其鍾意影旗袍。」佢又指喜歡收藏相機，家中有過百部，但相機鏡頭好多，當中更有古董，如十八世紀嘅鏡頭。佢話：「我覺得鏡頭就好似女性，每個鏡頭都影出唔同性格。」

第一手消息請下載on.cc東網iPhone/iPad/Android/Windows Phone Apps