城中鏡：金嗓子掛牌 江老娘送「自己」
喉糖股金嗓子周三首日掛牌，董事長江佩珍（江老娘）霸氣盡現，除咗豪邁敲鑼，股價仲全日都冇潛過水，收報4.87元，較招股價4.6元高5.86%，每手帳面賺135蚊。江老娘仲豪氣到送「自己」畀港交所，做上市紀念品添！
金嗓子董事長江佩珍呢個咁值得恭賀嘅敲鑼一刻，必會成為經典。
你都想「擁有」江老娘？Easy，皆因佢公司出品嘅喉糖，盒上面一定印住佢個嘜頭。佢送畀港交所嘅紀念品係水晶擺設，入面鑲住公司產品，寓意係視公司產品為至寶。希望入面盒糖可以放耐啲，再耐啲。
江老娘既豪氣又熱情，佢答傳媒提問時，全程笑容滿面，每答一個問題，都會鞠躬講多謝，好有禮貌。點解公司要叫「金嗓子」？江老娘話「最好的嗓子是金子般明亮的嗓子」。話時話，原來江老娘有副好磁性嘅金嗓子。
