政壇：郭炳聯夥陳國威做「讀男」
書展尋日開鑼，新地執行董事兼首席財務總監Patrick陳國威尋日出席書展嘅活動時，爆咗佢老闆新地主席郭炳聯係一名「讀男」。呢位「讀男」仲鍾意睇三個男人：喬布斯、林肯同李光耀。
陳國威話郭炳聯「隊」好多書佢睇。
Patrick即場爆話老闆郭炳聯最近睇緊美國前總統林肯嘅傳記學領導才能。佢又話，郭生睇書類型廣泛，仲會「隊」好多書畀佢睇。咁Patrick自己呢？佢話最近因工作關係，睇多咗有關經濟同管理嘅書。
原來，被郭炳聯叫埋一齊做「讀男」嘅，唔止Patrick，連新地傳訊總監Chris廖國偉一樣有份。Chris就喺舊年畀郭生叫睇《李光耀觀天下》（One Man's View of the World）。又話，郭生有睇開蘋果教主喬布斯嘅傳記同埋《易經》，覺得書中帶嚟好多做人道理咁話。
