政壇：袋巾傑反「抗日假」 吳康民：喪心病狂

康民叔話抗日戰爭令三百幾萬中國官兵戰死、幾千萬平民喪生，換來七十年太平日子，唔通唔值得紀念咩？大鬧袋巾傑點對得住千千萬萬為抗日而捐軀嘅中國軍民前輩，又指摘佢早年已經講過，香港由英國殖民地，變成「中國殖民地」，將國家同地方關係，講成係帝國主義同殖民地關係，實在令人髮指，只有喪心病狂嘅漢奸走狗，先會加以抹黑。

袋巾傑回應話，得到吳老咁嘅級數，用咁嚴厲嘅言詞批評，真係非常榮幸同欣慰，覺得吳老好畀面。但佢重申自己一開始已講過，其祖父喺日軍佔領香港期間受重傷，抗日戰爭對佢有切膚之痛，又質疑九八年取消香港重光紀念日假期嗰陣，點解康民叔又唔出聲？再者，今年放假，明年又唔放，係咪數典忘宗呢？好想康民叔回應吓喎。