政壇：泛民拉布 搵楊偉雄過橋
立法會財務委員會周二起，一連五日舉行二十八小時的馬拉松式會議，審議工務工程、五個民生項目，以及成立創新及科技局嘅撥款申請。尋日踏入第二日嘅會議，雖然泛民議員已再無爭議嘅項目拉布，但為咗拖，公文袋就提出邀請行政長官創新及科技顧問楊偉雄列席財委會會議。楊偉雄係咪做創科局局長一直未有定案，如今泛民好似已認定佢做硬局長兼請佢出席會議，好明顯為拉布拖延無所不用其極。
設計圖片及對白
公文袋議員陳家洛提出邀請楊偉雄出席財委會會議接受質詢，財委會主席張宇人於是宣布今午加開兩小時特別會議，討論邀請楊偉雄列席財委會事宜。張強調即使建議獲委員會通過，財委會亦只係去信要求楊偉雄出席，但楊會否出席，則視乎其個人意願。人民力量陳偉業話，即使楊偉雄答應列席會議，亦唔會影響激進泛民嘅拉布計劃。
張宇人嗌名連番甩轆
財委會用咗逾三小時審議東九龍文化中心嘅撥款申請，工程耗資約四十二億元，預計二○二○年完工。梁耀忠話工程投資龐大，但劇場數目和座位相對少，質疑成本效益。康文署指東九文化中心嘅劇場具互動功能，符合演藝團體的需要。建仔陳鑑林認為居民熱切期盼文化中心嘅落成，促議員唔好拉布，撥款最後喺三十票贊成，一票反對下獲得通過。
由於會議冗長，張宇人多次出現甩轆，包括接二連三將「何俊仁」叫錯「涂謹申」，何俊仁則以「我個樣好少少！」回應。財委會亦討論咗清水灣道與匡湖居之間嘅一段西貢公路分隔車道工程及蠔涌區內通路改善工程，有議員質疑車路造價太貴，但撥款仍大比數獲得通過。
