醜聞無奇不有 福地淪為亂地
近年香港好似撞邪咁，乜嘢怪事都有，食水含鉛超標已經夠晒聳人聽聞，家陣仲衰到屋邨連環中招，搞到居民冇啖好飲，唔驚就假。
衰開有條路，繼啟晴邨後，葵聯邨同埋水泉澳邨都被證實有食水樣本含鉛超標。咁仲唔止，啟晴邨有單位驗出含退伍軍人菌，雖然當局已經消毒，但居民依然人心惶惶，你話係咪禍不單行吖？
聽吓港府點講喇。高官話喎，會為受影響居民盡快鋪設臨時水喉，設置臨時供水點同埋水車，仲會將啟晴邨天台水箱直接駁喉到每個樓層，盡量方便居民。當局仲話，暫時未有證據顯示問題同內地預製組件有關，最大可能係喉管焊接物含鉛所致，當局會先更換喉管接口，以及跟進責任誰屬。冇錯嘞，食水係生命之源，市民每日不可或缺，如果連飲啖水都唔放心，社會想唔亂都幾難，到底源頭何在，邊個需要為事件負責，必須查清查楚，畀公眾一個交代。
講起真係無奈，政改啱啱告一段落，港府揚言要集中精力搞好經濟民生，以為可以鬆一口氣，耳根清淨，點知又爆發呢單民生大醜聞，證明所謂搞好經濟民生根本係大隻講。唔怪得反對派政客乘機抽水啦，區議會選舉即將來臨，政客為搶選票，仲唔借題發揮，落井下石咩。
所以話，人必自侮而後人侮之。如果唔係房屋署及水務署監管不力，敷衍塞責，又點會畀人有機可乘吖。更荒謬嘅係，衞生署官僚大講風涼話，指短期飲用鉛水對健康冇乜影響，唔使太擔心喎，呢啲咪叫傷口灑鹽囉。
冇計嘞，近年香港頭頭碰着黑，搞到競爭力每況愈下，樣樣都不如人。睇吓國泰航空就知嘞，唔止國際排名跌跌不休，投訴仲厚過電話簿，客機食水含菌有之，延誤當食生菜有之，貴賓專線長期唔通又有之。呢，尋日又有「甩轆」事件發生，航機緊急逃生梯無緣無故突然彈出，導致航班嚴重延誤，二百七十七名乘客受阻。一葉知秋，曾經全球排名第一嘅航空公司都搞成咁，香港唔亂至奇吖！
始終都係嗰句，盛極必衰，物極必反。香港一向被視為福地，以前順風順水，創造無數奇迹，可惜隨着社會愈來愈政治化，成日嘈喧巴閉，搞到七國咁亂，不斷沉淪。唔通香港真係氣數已盡，要打回原形做番小漁村？叮！
