城中鏡：炊水有方
「鉛水風波」不斷擴散，全城恐慌，尋日一眾名人出席國際金茶王大賽時都大講「水經」。一般人只關心水喉水乾唔乾淨、煲滾咗未，但對於奶茶專家、香港咖啡紅茶協會主席Simon黃家和嚟講，雖然飲蒸餾水更清純，但沖起奶茶時無乜味，所以唔會訂水上門飲喎。
黃家和（左）同協會名譽會長謝寶達歎奶茶欣賞比賽。
王詩雅對大會展出嘅懷舊點唱機甚感興趣。
啱啱忙完上海金茶王比賽嘅黃浩鈞趕返香港幫手。
響應美食車 巡港派茶
Simon話水質就好似麵包咁，有軟硬之分，香港水質屬於軟性，即係鈣質相對較低，但用嚟沖奶茶就啱啱好。至於蒸餾水雖然清啲，但因欠缺礦物質，泡沖奶茶反而唔夠香。不過有份擔任比賽評判嘅榮源茶行太子女王詩雅話，蒸餾水最啱嚟泡中國茶，佢話泡上等茶葉時為追求最純真嘅茶香，會揀用蒸餾水，泡出來嘅茶香零舍唔同。佢聽聞有茗茶發燒友好講究，日日跑上飛鵝山拎泉水泡茶同飲用，話飲咗身體好啲，真係信唔信由你。
講番個奶茶活動，現場擺咗幾件懷舊物件展覽，包括舊式相機、點唱機同收銀機等。Simon嘅兒子黃浩鈞話，呢幾件係爸爸嘅珍藏古董，單係部相機就有八十年歷史，至今仍然郁得，擺放出嚟係等大家邊歎奶茶邊欣賞古董。
Simon話為響應政府早前構思搞「美食車」，計劃用貨車改裝成一架奶茶車，嚟緊八月五號至九號，一連幾日巡迴全港十八區免費派奶茶，預計每日派一萬杯。
