政壇：搞搞政：冷手執個熱煎堆單雞或做新「內副」
早前都講過，湯家驊喺政改方案被否決後宣布退出公文袋，仲辭埋立法會議員一職，十月生效。大家都關注佢辭職後內會副主席一職花落誰家，但建制派唔接受抗爭手法愈行愈激嘅議員，估計會喺溫和啲嘅衞生服務界議員李國麟同白鴿黨議員「單雞」單仲偕二揀一。
設計圖片及對白
內會主席梁君彥同湯家驊一齊開內會年結記者會，個個都好關心邊個會接替湯做新「內副」。梁君彥話過去三年同湯合作愉快，覺得內會都係傾程序問題，唔係政治爭拗嘅地方，由一個泛民同一個建制主持，可以建立一個好好嘅溝通模式，應該珍惜。湯都話「內副」必須由泛民擔任，有助減少不必要嘅爭拗，令議會運作有效暢順，又話泛民二十幾人實可以搵到大家都接受嘅人選。
傳李國麟嫌困身拒玩
早前泛民「飯盒會」召集人、公文袋議員梁家傑就公開講，除咗一直喺黑名單嘅工黨議員李卓人同何秀蘭係唔受建制派歡迎嘅「內副」人選外，就連單雞同會計界議員梁繼昌都畀建制派點名唔接受。但其實只係幾位建制派隨口噏下，仲未拍板。
但建制派都冇得咁揀擇，撇除拉布議員同愈走愈激嘅公文袋，佢哋亦都因梁繼昌主持人事編制小組委員會時玩嘢而對佢有微言。揀嚟揀去，只得李國麟同單雞係建制派可接受人選。但據聞李國麟嫌做「內副」太困身，周五開內會同周三開大會都要駐守立法會候命，所以睇怕最終都係由單雞冷手執個熱煎堆。
