香港人好鍾意旅行，傳統嘅旅行團或自由行已經滿足唔到一班旅行老手。縱橫遊第二代接班人兼執行董事CN袁振寧話，港人外遊習慣愈嚟愈多元化，旅行社都要緊貼潮流。好似近排興搭郵輪，佢哋就推日本郵輪線，仲有深度鐵道遊等，總之要時刻迎合市民外遊口味變化。

袁振寧開拓特色旅遊滿足旅行老手。

讀完劍橋大學後即返家族公司幫手嘅CN話，細細個就認定要幫屋企做嘢，所以未認真諗過如果有得揀，佢會做邊行。回港幫手十幾年，佢努力令呢盤傳統生意變得不傳統，靈活應變，喺激烈嘅競爭下，算係做得唔錯。

CN話近年港人外遊習慣變化好大，例如興起網購同團購，甚至有人鍾意去程同回程坐唔同嘅航空公司。佢哋惟有時刻緊貼潮流變化，仲要反應夠快，呢期興啲乜就要及時推出相應產品，又要時刻掌握港人常去嘅國家新聞，難怪佢笑言忙到好似記者咁喎。

第一手消息請下載on.cc東網iPhone/iPad/Android/Windows Phone Apps