政壇：建制稀客行會請願博曝光

部分人或為區選鋪路

現場所見，佢哋唔止拉橫額表達訴求，仲個個舉起寫上自己姓名嘅牌子合照，擺明係乘機宣傳兼交功課，劍指十一月區議會選舉。

以往去行會請願嘅人多數係個人或居民協會，主打民生訴求。今次雖然拉大橫額嘅係公屋聯會，但係二十幾人之中唔少人都係有意參選區議會嘅建制派，當中有建仔、西九新動力等，連唔受「鉛水風波」影響嘅港島東區同大埔，建仔都有派支部人員現身。

當中企喺中間發言嘅，係盛傳有意參選啟晴邨新選區嘅西九新動力成員兼九龍城居民聯會啟晴邨總幹事梁婉婷，同盛傳有意參選屋邨長沙灣邨，挑戰民協社區主任鄒穎恒嘅建仔張德偉。