政壇：台機當國產 樹根又撞板
啟晴邨爆發食水含鉛風波，揭發該邨單位嘅廚房同廁所原來係使用內地預製組件。一班泛民主派議員尋日喺立法會財務委員會就借題發揮，要求政府喺工務工程當中唔好用內地材料，議員「長毛」梁國雄仲懶醒咁話，成班議員有邊個會用中國手機吖！點知建制派鍾樹根就大大聲講︰「我係用中國手機！」真係估佢唔到。
鍾樹根將台灣品牌手機當國貨。
話說議員七嘴八舌，話內地偷工減料嚴重，促當局要加強抽查。議員陳志全亦叫有關部門喺活化沙田城門河河濱工程中，如安裝內地照明系統須多加監察。長毛就加把口唱衰國貨︰「呢度邊個用大陸手機吖？」佢強調咁講唔係歧視，不過內地製品一向質素差啲。
但樹根就即刻反駁，仲形容佢部手機係「自由祖國牌子、社會主義生產」咁話。事後問番樹根究竟係用邊個內地品牌手機，點知查實係佢誤將台灣一個著名品牌手機當「國貨」，樹根果然「政治正確」。不過佢究竟係矇查查，錯將台灣品牌當內地品牌，定係真「愛國」呢？
