政壇：立會擺沙包無規無矩
泛民主派議員成日當立法會係自己屋企，如喺舊年佔領行動期間，借浴室同活動室畀佔領人士沖涼同瞓覺，搞到立法會好似無掩雞籠同賓館咁，更甚者有議員助理試過運發電機連油呢啲危險品入立法會，完全漠視大樓嘅安全。立法會行政管理委員會尋日開會，再踢爆新民主同盟嘅議員范國威早排去信行管會，建議將自己屋企個沙包擺喺議員專用健身室。范國威搬咁多家當入立法會，唔通以為自己一定連任成功？
設計圖片及對白
不過，呢個要求被行管會委員斥為「無規無矩」，點可以任由議員想帶乜嘢去立法會都得，容乜易帶個飯煲嚟用？有人認為如果需要嘅話，應該交由立法會秘書處採購。老實講，都係唔想開先例啫！范國威就辯稱，健身室使用率好低，雖有四、五部單車機同兩張梳化，但好似都冇乜人用，佢成日都喺立法會，所以只係想自費擺放沙包。結果行管會最終決定諮詢全體議員，睇吓健身室使用情況同埋有乜嘢不足之處。
屢有前科 曾被警告
其實，范國威當立法會係自己屋企早有前科，佢喺佔領期間試過畀佔領人士入健身室沖涼，一度被行管會發警告信。身為中文大學校董嘅佢，又試過帶中大學生擅闖同為校董兼議員嘅葛珮帆同張宇人辦事處樓層抗議。
講番擺沙包，范國威話係上年開始玩，想「強身健體」喎。另外，行管會尋日通過增聘一位高級保安同十一位保安職位，以回應立會保安報告，應付新增保安檢查等，開支約四百萬元。
