港校熱潮已不再 皆因香港不可愛
正所謂，此一時，彼一時。來港讀大學曾經係唔少內地尖子嘅夢想，可惜時移勢易，隨着內地飛速發展，國人荷包腫脹，仔女留學選擇愈來愈多，加上香港自己唔爭氣，教育質素下跌，趕客惟恐不及，已經冇呢支歌仔唱咯。
好似香港大學咁吖，下學年錄取三百零九名內地尖子學生，其中二十二位更加係省、市或單科狀元，呢個數字表面睇幾理想，實際上好睇唔好食，事關該校自○五年參加內地高校聯招以來，申請數字一直穩步上揚，一二年高峰期申請人數更加高達一萬二千幾人，省市同單科狀元則有三十幾人，之後就一直回落，今年申請人數首次跌破一萬大關，出年唔知再跌幾多添呀。
嗱，港大貴為本地龍頭大學，尚且愈來愈唔馨香，其他院校嘅情況可想而知。有大學申請人數短短三年間大幅下挫超過兩成；有大學以往收開北大、清華嘅分數線，依家都要紆尊降貴，睇餸食飯，可見「港校熱」降溫係不爭嘅事實。
點解內地尖子過門不入？一個最重要嘅原因係物非所值。本港大學學費年年加價，雖然話內地盛產土豪啫，但你估真係「錢多人傻」咩？人哋都有眼睇，香港大學嘅排名近年好似食咗瀉藥咁，跌跌不休。既然花得起錢，點解唔索性送仔女去歐美留學呢？
仲有吖，香港社會愈來愈政治化，家嘈屋閉，七國咁亂，連本應與世無爭嘅象牙塔都不得安寧。舊年佔領之亂，唔少領袖都係大學生，佢哋有書唔讀，居然獻身街頭，淪為「黃衞兵」。年輕人熱忱有餘，理智不足都算嘞，為人師表仲要喺背後煽風點火，甚至幕前指揮，搞到師不師生不生，係人都怕怕啦！
最慘仲係近年中港矛盾愈演愈烈，排內情緒愈來愈高，內地生真係如人飲水，冷暖自知嘞。嗱，早排有位內地女生喺香港車禍身亡，本來係一件悲劇，居然有人興高采烈，你話係咪令人齒冷吖。加埋鳩嗚、驅蝗、光復行動不斷，針對嘅都係內地人。將心比心，做父母嘅梗係擔心子女來港讀書係咪有安全風險喇。
風水輪流轉。以前就話內地尖子學霸爭崩頭落嚟讀書，香港高校皇帝女唔憂嫁，近年輪到港生對北大、清華趨之若鶩。冇計喇，人哋就穩步發展，我哋就不斷沉淪，再咁落去，「港校熱」就冇嘞，「北校熱」就有份，叮！
