城中鏡：霍麗萍拍靈異照行善
已故全國政協副主席霍英東長女Pat霍麗萍有個顯赫家族背景，但寧願揹着相機，四十多年來遊歷世界各地，拍下逾百幅靈異照片。近日佢出版攝影集，擬將收益捐助聯合國教科文組織，協助地震後嘅尼泊爾重建文化遺迹。
四十三年前霍麗萍（箭嘴示）首次到訪內地，拎出相機拍照時引來途人圍觀。（受訪者提供圖片）
霍麗萍透過相機感受宇宙間嘅奇妙能量。
喺尼泊爾影到肉眼睇唔到嘅靈光異像。
曾攝聖母身影
由大學畢業後一個攝影課程起，阿Pat幾乎「嫁」畀相機。二十幾歲已獨闖婆羅洲影食人族。七十年代到訪人煙稀少嘅西藏、不丹，以鏡頭捕捉人間仙境。有次佢去武當山取景巧遇一位世外高人，點化佢用心靈感受宇宙間嘅能量，細味天外有天嘅奧妙。從此，阿Pat不再追逐眼前景物，改以如入禪定方式取景，竟然開始拍得色彩繽紛嘅靈光異像。好朋友覺得難以置信，反問佢影相時係咪手震，令阿Pat啼笑皆非。
然而靈異嘅效果一再出現。大約九年前，阿Pat見爸爸身體唔係咁好，於是去法國南部傳說曾有聖母顯靈嘅路德，為爸爸點蠟燭祈福。驟見附近有個聖井，拎起相機一拍，竟發現井水乍現聖母身影。佢亦曾拍得一位神父專注祈禱時，靈魂突然出竅飄到空中嘅異景。朋友以為阿Pat「撞鬼」，佢卻反過來安慰對方話：「大自然背後蘊藏奇妙能量，你肉眼睇唔見，唔代表佢哋唔存在。」
