政壇：搞搞政：鉛水風波抽唔到水 蔣麗芸甩轆亂拋波

建仔怕件事焦點被模糊，所以尋日急急幫阿Ann將個波拋出去，轉手畀該黨黨主席李慧琼接手。跟住又急起直追做騷，一方面約見房屋署署長，另一方面主動出擊，聲稱要驗足五十個屋邨食水咁話。

民協失威被搶頭啖湯

其他政黨又點會輕易放過抽水嘅機會，數最扼腕嘅莫過於民協，因為佢哋早喺二月份就收到有人提供啟晴邨水龍頭含致癌重金屬嘅消息，民協謹慎起見，搵咗一名大學教授做化驗，六月有結果。點知嗰位教授跟住出咗埠，七月中先返，結果等唔切民協揭開真相，就被人飲咗頭啖湯，認真失威。

「後知後覺」點都好過「不知不覺」，一直瞓緊覺嘅公文袋尋日先識得落區派水畀居民，果然貫徹該區議員毛孟靜勁離地嘅特質。但最離譜係西九新動力「抽錯水」，前日仲走咗去出現死魚嘅啟德抽水，尋日先識得搵人開記者會補飛，真係輸得好難睇。

睇番各政黨措手不及嘅反應，今次率先踢爆事件嘅白鴿黨「一舊雲」黃碧雲應該會偷笑，佢近日仲日日落區同開記者會逼政府回應，真係乜水都畀佢抽盡喇！