政壇：星星甩底「大嘥鬼」 陸恭蕙頂替出騷
政府宣傳「大嘥鬼」算係深入民心，「大嘥鬼」公仔喺網絡上亦頗受網民歡迎。尋晚有個「FACE大嘥鬼青年交流會」，被形容同大嘥鬼好似樣嘅環境局局長「星星」黃錦星甩底，由副局長Christine陸恭蕙臨時頂上。Christine話局長其實好出名，連佢兩個姪仔、姪女都知局長乜嘢樣，認真唔簡單。
陸恭蕙臨時頂上，同大嘥鬼一齊出席活動。
Christine話早前見到一對姪仔、姪女，兩人話佢嘅老細係光頭嘅。雖然唔知局長對呢句話有乜嘢感受，但Christine就認為咁證明咗局長做環保工作做得好，連小朋友都認得。佢又提到有朋友問當局幾時會重推垃圾蟲，但佢覺得垃圾蟲係上一代嘅童年回憶，後生呢一輩已經唔知垃圾蟲係乜？相反，依家大嘥鬼咁受歡迎，佢希望大嘥鬼可以成為年輕一代嘅icon（標誌），而未來除咗大嘥鬼同慳神，仲會有其他角色陸續登場，大家可以拭目以待咁話。
