政壇：鄭承隆終同新民黨斬纜
話說新民黨前副主席Edwin鄭承隆喺三年前入黨，舊年九月因意見不合要求退黨，但雙方就收唔收到退黨信一事雞同鴨講。事隔十個月，新民黨終於證實兩星期前完成咗Edwin嘅退黨申請，Edwin亦都話已收到該黨回覆，件事總算畫上句號。
恢復「自由身」嘅鄭承隆話會積極將地區工作再做好啲。（資料圖片）
Edwin話，喺近十個月來，新民黨領導層同佢完全冇溝通，雙方停留喺「空氣中對話」。直至個幾星期前，佢收到新民黨嘅回覆，雙方關係終於正式斬纜。講講吓，Edwin又忍唔住寸新民黨，事關上個月佢收到該黨信件，要求佢唔好再做地區工作，理由係太多人喺地區做嘢會令人混淆喎。不過，Edwin十幾年嚟一直喺荃灣服務居民，仲做過仁濟醫院董事局主席，又點會因為黨內紛爭而退縮呢？
恢復「自由身」之後，Edwin話會「努力做人」，積極將地區工作再做好啲。至於明年嘅立法會選舉，佢形容新界西係主戰場，會積極考慮參選咁話。
