政壇：大時代話咁快玩完 證券行打回原形

冇耐前，仲記得啲證券行負責人「晒命」，話港股開戶人數多到離晒譜，一日等於以往十日嘅工作量，飯都唔得閒食，晚晚夜收工，仲誇張到話因為前線負責開戶嘅經紀係咁催逼後勤同事快啲批核開戶文件，搞到兩幫人嗌晒大交。

相隔都唔夠三個月，證券行內依家唔單止唔使再嗌交，直頭悶到要捽手指。事關開戶文件之前平均每日有六十份，港股大時代高峰期更過百份，依家跌到只得十幾份。

仲有，港股大時代期間，特別多客投訴，好似死機、慢機、存錢問題等，因為當時好多多年嚟冇晒影又冇交易嘅「殭屍戶」突然復活，加入炒股行列，又要重新Set密碼同存錢，又因太耐冇炒股而唔熟行情，自然投訴多多。依家啲殭屍戶又返晒去冬眠，投訴少晒，證券行得閒咗，真係唔知係開心定唔開心。