做股東要似做老婆咁「持家有道」？中國房地產協會副會長任志強講親嘢都好有氣勢，所以有「任大炮」之稱，佢上星期喺個創業論壇上原本講開股東責任，講講吓就發炮，話個市依家上上落落成咁，就係因為太多股東唔想「做人老婆」，反而一味想做「小三」，一有機會就套現走喎。

任志強話個市依家上上落落成咁，係因為太多股東一有機會就套現走。（資料圖片）

點先為之「持家有道」呢？任大炮話要幫企業「做大做強」，仲要關心企業，先叫盡咗股東嘅責任；但佢好勞氣話依家好多人淨係諗住一到高位即刻套現走人。

但有網民寸任大炮，話做「老婆」都要門當戶對o架，散戶本身就配唔起，做到「小三」已經算係咁，仲話千祈唔好上男人嘅當，一蝕晒佢就會一腳伸你出門口，你連「小三」都無得做。網民仲話，做「老婆」嘅機會都係留番畀唔怕蝕嘅「富婆」任志強咯。

話時話，今時今日好多屋企，兩公婆都要出去做嘢，仲邊有話一定要老婆去孭「持家有道」四個大字呢可。

第一手消息請下載on.cc東網iPhone/iPad/Android/Windows Phone Apps