政壇：陳健波轟泛民 呃飯食
立法會已經否決咗政改方案，普選特首遙遙無期，要普選立法會更加唔知要等到幾時？但係泛民主派同建制派就政改立場南轅北轍、針鋒相對嘅事實仍然冇變。立法會尋日討論《選舉法例（雜項修訂）條例草案》，技術性修改明年立法會選舉功能界別嘅選民基礎、名稱等，法案最終獲通過，但會議又再淪為泛民同建制借啲意鬧交嘅地方。
（設計圖片及對白）
譚志源斥借題發揮
近排成為建制派「重炮手」嘅保險界議員陳健波，尋日喺會議上率先為功能界別議員辯護，聲稱功能界別議員出席率比直選議員高，批評部分人將佢哋誤導為「零票當選」，係被「有系統、有計劃」咁抹黑。佢仲話因冇人挑戰而當選嘅功能界別議員應該叫做「全票當選」，相反部分議員「呃飯食」，做咗幾十年議員都係靠反對而生存，暗批一眾只識唱反調嘅泛民議員。
紡織及製衣界嘅鍾國斌就承認部分功能界別選民基礎混亂，好似佢嘅界別，有兩個喺該界別已十八年嘅業界組織，今年卻分別轉到工業總會同進出口界，政府一直冇作任何解釋。雖然功能界別冇分建制泛民，但係局面都係混亂。
泛民一向要求撤銷功能界別，當然唔會對建制派嘅批評罵不還手喇！工黨李卓人就批評功能界別係維護既得利益者；白鴿黨劉慧卿就反對法案，指政府只係作小修小補，認為政府失職，最終係想令功能界別永續存在。坐喺度聽議員鬧交嘅政制及內地事務局局長譚志源就直指法案係技術性修訂，但有議員發言借題發揮，趁機講其他嘢喎。
